Rannsóknarsvið
Á mismunandi tímum hef ég stundað rannsóknir á eftirfarandi sviðum: Frumspeki (verufræði eiginleika, hlutlægni og huglægni), hugspeki (skynjun), femínísk heimspeki (frumspeki kyns, femínísk þekkingarfræði og siðfræði), vísindaheimspeki (hluthyggja og andstæður hennar). Nýjustu rannsóknir mínar eru innan félagslegrar verufræði og félagslegrar þekkingarfræði, femínískrar heimspeki og hagnýtrar siðfræði. Ég er skoða ýmislegt sem hefur að gera með félagsleg valdatengsl og hvatana að baki grasrótarhreyfingum, þekkingarlegt ranglæti, gaslýsingu og önnur form þvingunar og afvegaleiðingar, efnahagslegan ójöfnuð, afmennskun, stöðu kvenna í vísindum og ýmislegt sem tengist #MeToo-hreyfingunni, svo fátt eitt sé nefnt af mínum aðeins of mörgu áhugamálum.
Flæðandi siðfræði: Femínísk siðfræði og #MeToo
Verkefnið Flæðandi siðfræði: Femínísk siðfræði og #MeToo er styrkt af Rannsóknasjóði 2023 til 2026. Það felur í sér rannsókn á áhrifum #MeToo-hreyfingarinnar á siðferðilega hugsun og á ýmsum siðfræðilegum málefnum sem tengjast þeim málefnum sem #MeToo-hreyfingin snýr að.
Veruleiki peninga
Ég stýrði verkefninu Veruleiki peninga sem var styrkt af Rannsóknasjóði (Rannís) árin 2015 til 2017. Bókin mín The Reality of Money: The Metaphysics of Financial Value er afurð þessa verkefnis og kom út í október 2018 hjá Rowman & Littlefield International. Hún fjallar um verufræði peninga en endurspeglar um leið ýmsar félagslegar afleiðingar og álitamál sem tengjast peningum og notkun þeirra.
Femínísk heimspeki og umbreyting heimspekinnar
Ég tók þátt í verkefninu Femínísk heimspeki og umbreyting heimspekinnar sem styrkt var af Rannsóknasjóði (Rannís) árin 2015 til 2017. Verkefnið var helgað því að sýna hvernig femínísk heimspeki getur verið umbreytingarafl innan heimspekinnar.